ولع فيا بالبنزين.. شاهد أسماء تروى تفاصيل حرقها على يد زوجها
ولع فيا بالبنزين علشان عايز فلوس من أهله.. بتلك الكلمات بدأت أسماء الزوجة العشرينية رواية مأساتها بعد قيام زوجها بإشعال النيران فيها . وقالت أسماء الزوجة العشرينية: “يوم الواقعة دي هو احنا صحينا من النوم وكنت بجهزله الشنطة علشان هو كان رايح الجيش بتاعه، وبس معرفش ليه هو راح رمي الشنطة بره البيت وأنا نزلت …
ولع فيا بالبنزين علشان عايز فلوس من أهله.. بتلك الكلمات بدأت أسماء الزوجة العشرينية رواية مأساتها بعد قيام زوجها بإشعال النيران فيها .
وقالت أسماء الزوجة العشرينية: “يوم الواقعة دي هو احنا صحينا من النوم وكنت بجهزله الشنطة علشان هو كان رايح الجيش بتاعه، وبس معرفش ليه هو راح رمي الشنطة بره البيت وأنا نزلت لميتها تانى ودخلتها البيت”.
واستكملت قائلة: ” بعد ما حصل كده نزل عند أبوه وأمه علشان ياخد منهم فلوس، بس هما قالوله مفيش فلوس معانا نديهالك عالصبح كده”.
وأضافت:” بعد كده هو فضل يهدد فيهم بإنه هيولع في البيت وفيهم، وهما كانوا بيفتكروا انه بيهرج وخلاص، بس هو جرى على بره جاب بنزين من قلب الدراجة البخارية بتاعته في كوباية، وأنا كنت واقفة معاهم في البيت راح قام شاددني من شعرى ووقعني على الارض ودلق البنزين على جسمي وولع فيا”.
وأوضحت: ” بعد كده فضلت اصرخ من النار اللى ولعت فيا وبسرعة قلعت العباية اللى كنت لابساها والناس والجيران اتلمت ولبسوني عباية تانية”.
واضافت:” بعد اللى حصل ده كله جريت من جوزي على بيت جدي فى الشارع اللي جنبنا وهو فضل يجري ورايا علشان يكمل الاعتداء عليا بس فيه ناس مسكته وأنا كملت جرى على بيت جدي”.
وأكد:” لما وصلت عند جدي معرفنيش من اللى حصل في وشى من الحروق والنار اللى مسكت فيا ولما اترميت فى حضنه قالى انتى مين فقولتله أنا أسماء بنت ابنك، ووصل جوزي عندنا واللى قاله أمشي دلوقتى واقصر الشر فمشي واتصل بابويا علشان يوديني المستشفى”.
واستكملت:” لما وصل أبويا خدني ووداني على مستشفى القصر العيني بس مكنش فيه رعاية واستنيت من الساعة ٩ الصبح حتى ١٢ بالليل واتنقلت مستشفى تانية خاصة واجريت ٤ عمليات تجميل في وشي من اللى حصله من حروق”.
واكدت:” جوزى ده عصبي ومندفع، ودايما لما كان بيتخانق مع حد يجي يفش غله فيا أنا علشان أنا الساهلة بالنسباله، وكان فيه مشاكل عادية كمان ما بينا”.
وأضافت:” أنا من ساعة ما اتجوزته وفيه مشاكل بينا كتير ومرتين قبل كده كسرلي دراعي، ولما اروح بيت أهلي يخلوني ارجعله تاني علشان خاطر بنتي سجدة وابني محمد ومخربش بيتي والعيال يضيعوا وده اللى بيخليني ارجعله تاني”.
واختتمت:” أنا نفسي اخد حقي منه علشان انا متظلمش ولا هو كمان، ونفسي ارجع زى الأول”.
